Ua lē taunuu ona aumai se faai’uga a le faamasinoga i le talosaga e tatala i tua ma le vaaiga a leoleo, le to’asefulutasi o tama tane o le nuu o Lefagaoalii ua latou ioe i le moliaga o le faaoolima ma le moliaga o le ave faamalosi o se tagata.

O le aoauli o le Aso Lulu o le vaiaso nei na faatulaga e aumai ai le faai’uga a le afioga i le faamasinoga o le Faamasinoga Maualuga, susuga Leiataualesa Darrel Clarke, peitai ua talosaga le loia o Alex Su’a o loo tula’i mo i latou ua molia i se avanoa se’i silasila lelei ai i tolaulauga a leoleo e faasino i moliaga ma tāpā ni finagalo o i latou ua molia pe latou te talia pe teena tolaulauga a leoleo i moliaga poo le police summary of facts.

O le Aso Faraile nei o le a toe valaau ai le talosaga e tatala i tua poo le bail application a i latou o loo molia ae ua faaauau pea ona taofia uma i latou e to’asefulutasi e aofia ai ni matai ma taulelea e faatali se faai’uga o le latou talosaga pe talia pe leai.

O le Aso Faraile o le vaiaso a sau o loo faatulaga e lau ai se faai’uga i moliaga o le faaoolima ma le ave faamalosi o se tagata ua ioeina e i latou o loo taofia ma le to’atasi o se isi matai ua ia ioeina foi ia moliaga, ae o loo tetee i le moliaga o le faia o se tau faamata’u e faaoo le oti i se tagata.