O le gugulu o lagona o le au fai saofaga i le faaputugatupe o le lumanai manuia o tagata le NPF, ona o se lipoti na faailoa ai le tuuina atu e lea faalapotopotoga tuma’oti a le Malo o ni totogi faaopoopo poo service fees i le latou auaunaga, ua faamalamalama e le taitaifono o le komiti faatonu o lea faalapotopotoga a le Malo ina ia nofo silafia ai le atunuu aemaise o le au fai saofaga.

Na faaalia e le taitaifono le susuga Papalii Tavita Moala i se feiloaiga ma tusitala a o lei malolo galuega a le Malo mo aso fiafia o le Kerisimasi ma le Tausaga Fou, e lē o tagata uma e fai saofaga e tuuina iai tau faaopoopo o auaunaga.

Ua na o tagata fai saofaga lava e toe manaomia se iloiloga e toe faia ai ni aitalafu faaopoopo ae ua iai se taofiga ona ua faaletonu le totogiina o le nonogatupe e ave iai lea totogi o auaunaga.

E faapena foi i se tagata fai saofaga o loo faamaonia se nonogatupe a se isi o lona aiga poo se faataitaiga o se tasi o le fanau i lana saofaga ae ua fia tala ona ua litaea, e ave iai le totogi lea mo le auaunaga e iloilo ai lana talosaga.

O nisi o le au fai saofaga ua aafia i lea tulaga o i latou ua litaea ae e lei talaina lava le saofaga ona o loo faamaonia ai se nonoga tupe.

Na tali le susuga Papalii Tavita Moala i lea mataupu tāua ona o le fesiligia i le auaunaga a le NPF o le a tuuina atu le meaalofa e 2 tesimale 4 pasene lea e amata totogi i le ogatotonu o le vaiaso fou.

Na faaalia e le taitaifono e leai se totogi o lea auaunaga, o lona uiga e lē tāpā e le NPF se service fee mai tagata fai saofaga.