Ua faamalosia e le Minisita o le Va i Fafo, Winston Peters, le Komesina Maualuga o Niu Sila i Peretania e faamavae mai, tusa lava pe na te teena.
Ua faaalia le lē fiafia o Peters i saunoaga a le Komesina Maualuga ia Phil Goff na ia faia faasaga i le Peresitene o Amerika, Donald Trump a o faia ai se tasi o faatalanoaga tuusa’o na iai ma le Minisita o le Va i Fafo a Finland.
Na faapena ona faailoa sa’o e Peters ia Goff, e lē o se auala lea e tatau ona saunoa ai ma o lea foi e na te tauavea le malo ma faiga faavae aemaise o foliga o Niu Sila.
O le tuli ai e Peters o Goff o se faai’uga na ia faia e aunoa ma le talanoa i le Palemia, Christopher Luxon, ma mulimuli ane saunoa Luxon, o le faai’uga e faia e Peters, o loo ia lagolagoina foi.
E ui lava foi i finagalo faaalia o lē sa avea ma Palemia o Niu Sila i tausaga ua mavae, Helen Clark, e lē fetaui le tuli o le Komesina Maualuga ona o ana faamatalaga, peitai mai a Luxon, e sa’o le faai’uga ua faia e le Minisita ia Peters.
Mai le matāgaluega o le Va i Fafo ma Fefaataua’iga a Niu Sila, o loo faia nei faatalanoaga ma Goff e tusa ma lona toe foi mai i Niu Sila.
Puna o Faamatalaga: https://www.1news.co.nz/2025/03/06/peters-says-goffs-role-in-uk-untenable-after-trump-remark/
