Ua faamalolo lē tumau se alii leoleo sinia o loo umia lea tulaga faaleoleo o le Inspector ao faia ai se suesuega faalotoifale o le Matagaluega i tuuaiga o le suia o ni faamaumauga a leoleo.
O le alii leoleo ia Kenneth Komiti o se tasi e galue i le vaega e feagai ma le finauina o moliaga solitulafono i luma o le faamasinoga poo le Prosecution.
O le faaiuga e faamālōlō lē tumau ai lea alii leoleo sinia ina ia faatali ai le taunuuga o suesuega na faailoa e le Sui Komesina o Leoleo afioga Auapaau Logoitino Filipo i se pepa o faasalalauga faalotoifale a le Matagaluega o Leoleo ma Falepuipui.
O Kenneth ua silia ma le 10 tausaga o galue i le galuega faaleoleo ma o loo faagasolo nei suesuega a le matagaluega i lea mataupu e saili ai mafuaaga o lona suia ai o faamaumauga a le Ofisa i se mataupu e aafia ai se tagata faipisinisi i le atunuu.
Taua i ripoti e faapea o nei faamaumauga ma ripoti na suia a Kenneth o se mataupu e aafia ai le ava malosi, le avetaavale ao faasuavā (DUI) lea o loo molia ai se alii faipisinisi i Samoa ma o loo tālia nei i luma o le faamasinoga faaitumalo.
Ina ua taumafai atu tusitala e faafesootai Kenneth mo sona manatu i le mataupu ae tali lea alii e le’i faailoa atu ia te ia lea tulaga i Iea taimi.
O le tausaga na tea nei i le masina o Iulai na faamālōlō lē tumau ai foi Kenneth ona o lona tagofia o se laau malosi o loo auga iai suesuega o se soligatulafono sa tālia foi i luma o le faamasinoga peitai na toe foi i le galuega i le masina na sosoo ai.
