Mai le tauafiafi o le Kerisimasi e oo atu i le tauafiafi o le toe aso o lenei tausaga a o lumanai le uluai aso o le tausaga fou 2024, ua molimauina o loo faaauau pea le tiute tauave o leoleo i le faamalosia o le tulafono ma puipui le saogalemu o tagata ma a latou meatotino.
O le Kerisimasi ua faailoa e leoleo sa filemu seia vagana mataupu tau solitulafono i le tagofia o le avamalosi, ma nai faalavelave tau taavale.
O se tasi o ia faalavelave tau taavale sa tupu i Savaii i le vaiaso a o lumanai le Kerisimasi lea e toavalu tagata na aafia ai i ni manu’aga, o nisi o loo taofia pea mo togafitiga ona e ogaoga o latou manu’a.
O le Aso Lua i le tuanai o le Kerisimasi na maua ai se tino maliu o se tama tane i le sami i gataifale o Nofoalii, ma o loo faia iai suesuega e faamautu ai le mafuaaga o le maliu, ona e lē o iloa pe na malemo poo se isi mafuaaga.
