E pei ona iai le faaopoopoga i le fuainumera o Minisita o le Kapeneta ma Matagaluega o le a galulue ai o se tasi o matagaluega fou, o le Matagaluega o Taaloga ma Alaga’oa mo le Soifua Fiafia o Tagata (Sports and Recreations) lea ua mae’a faatautoina ai le Afioga ia Laumatiamanu Ringo Matthew Purcell.
Na fesiligia ai le finagalo o le Afioga i le Minisita o Aoga Taaloga ma Aganuu, Seuula Ioane Tuaau e tusa ai o lenei matatia fou ma ia ta’ua ai ua leva ona fuafuaina mai lenei vaega.
“Ua leva lava ona talanoaina e le vaega sa iai muamua peitai e lei faataunuuina ae o le taimi la lenei o lea ua a’e ai se tofa i le Tamaitai Palemia ma le Kapeneta ua amata loa ona amatamata lemu.
“O lea e faamautu i le taimi lenei i gauta i le ofisa o aoga taaloga ma aganuu la ua fai ai le ofisa o le Minisita e faaaogā le aufaigaluega lea sa i lalo o le vaega o taaloga ae pau le vaega la e saili e le Minisita o lana aufaigaluega mo totonu o lona ofisa e tau ina amata ai i le taimi lenei.
“Ae ou te iloa o le faamoemoe mo le vaai mamao i le lumanai e ono faatulai mai sona ofisa o le a tutoatasi lava taaloga latou ma aga e faafiafia ai tagata e pei o le agaga lena o le faamoemoe.
“O la e i lalo a o le paketi lea mo le tausaga lea na pasia talu ai nei o la e faagaioi ai fuafuaga nei ae o la e tapena mo le paketi o le tausaga fou ia ona aveese loa lea o se latou vaega tupe.”
Mo le taimi nei na faailoa ai e Seuula e tasi lea itu o loo tilotilo iai ona sa iai le manatu se’i tau tuu mai a le avanoa i le Ofisa o Aoga na o aoga e tilotilo ai le Ofisa o Aoga i le tulaga e tatau ona siitia ai aoga.
“Ona o le a iai nisi o Matagaluega sa pipii ai e pei foi la o taaloga sa alu ai foi la le tele o taimi o le Pule Sili ma le aufaigaluega ia ae o le agaga ia se’i tuma’oti a mea tau aoga ona e mo’i lava ia tatou taaloga ae pei o le vaega o aoaoga lea e fai si pa’ū laititi lava ma o loo fia siitia lea tulaga.
“Atonu o se tasi lena o vaega tele lava la e tilofia e le Matagaluega, ia toe luitauina pea le aoaoina o faiaoga aemaise lava i fanau aoga o le fetuunaiga o a matou curriculum ina ia tau ogatasi foi ma le vaega foi o nei vaitau.
“Aemaise o loo iai lava le faalagolago a le Matagaluega e saili atu i le lautele poo le community e iai foi nai nisi o tatou tagata o loo iai le tomai i tua i afioaga ina ia mafai ona auina mai sa latou fesoasoani e tau fesoasoani ai i aoga i le atunuu.
“E lē ‘alo i le ata o le niu lea tulaga ona o tulaga na aafia ai tatou i le faama’i ia o le itu lena o loo matuai tilotilo ai le Matagaluega o Aoga ina ia siitia ai le tulaga o le ola aoaoina o alo ma fanau.
“I le vaai lautele lava ia a matou i le iuga o suega, e pei e lē o se tulaga lelei lea ua tulai mai ma e pei o se tasi foi lena o itu na silasila ai le Palemia ma le faigamalo pe lē o se isi lea avanoa e mafai ai ona tele le taimi e silasila ai i vaega e faaleleia ai aoga a le fanau.
“Ua ou fiafia i lenei suiga ua faatino, ae pei ona fai atu, o se avanoa e toto’a ai le silasila a le Ofisa o Aoga lava ia i mataupu o loo tulai mai ma saili fofo i faafitauli o loo feagai ma aoga i le atunuu.
“E lē gata i lea o le a silasila lava aoga ia i taaloga mo tamaiti aoga ae o lea o le a iai le vaega lea ei luga e vaaia tulaga i taaloga o le Olimipeka auā o le mea sa iai nei na mafua ona tuu i lalo o le Matagaluega o Aoga ona o le sootaga o aoga ma taaloga ae ua oo mai i le taimi nei ua lavea mai ai ma asosi mai fafo ma isi taaloga ma tele ai le avega o loo tauave e le matagaluega.”
