O se polokalame i le omai faatasi lea o tama ma teine taaalo Pasefika i soo se faagatama i totonu o Niu Sila ina ia le gata e faamalosiau ae ave le lagolago i soo se tasi lava ina ia fai o latou tui puipui o le koviti19.
O le latou tali atu lea i se talosaga a le Samoa Tutū faatasi ina ia fesoasoani e siitia le fainumera o tagata e agai e fai o latou tui puipui aemaise lava aiga Pasefika.
O le toatele o alii ma tamaitai taaalo na faasoa o latou manatu ma ave foi fautuaga i tagata lautele i totonu o Niu Sila, o le taua lea o le fai o le tui puipui. Mo aiga Pasefika lava ia e faamuamua puipuiga o aiga mai le faama’i o le mafuaaga lea o le naunau ai ina ia fai tui puipui.
O nisi o faasoa na faatusatusa ai le telē o le aafiaga ma fanau laiti i le Pasefika na maumau ola ona o le lē faia o tui puipui o le misela ma o se faataitaiga lelei lea ina ia fai tui puipui mo le saogalemu.
E tauala atu lenei unaia mai alii ma tamaitai taaalo Pasefika ina ia mafai ona toe foi i faiga masani aemaise o le itu tau taaloga ina ia mafai ona toe faia taaloga eseese e aunoa ma se popole i aafiaga o le Koviti aua o le faia o le tui puipui e puipuia mai ai e le gata o oe o lou aiga faapea le atunuu atoa.
O nei sui taaalo na faasoa o latou manatu e aofia ai Faumuina Toaletai David Tua, Lemalu Semo Sititi, Roger Tuivasa- Sheck, Linda Vagana ma le susuga Namulauulu Alama Ieremia.
