Na faateia le mamalu o le atunuu ina ua maua ni ripoti i le afiafi o le Aso Faraile vaiaso na tea nei e faapea o le a tapunia le Facebook ma soo se social media I totonu o Samoa.
O nei faamatalaga na feaveai i luga o upega tafailagi e faapea o se iuga lea o se fonotaga na faia e faauluuluga o nisi o Matagaluega a le Malo i lalo o le faatonuga a le Palemia o le Malo Tausi.
Na faamoania nei ripoti mai le tele foi o nisi tusitala e pei o se tasi o tusitala lauiloa ia Michael Field i totonu o le Pacific Newsroom, ma na faaali ai foi le manatu o le Sui Taitai o le vaega faaupufai o le FAST i le taeao o le Aso Toonai ia Laauli Leauatea Polataivao Schmidt e faapea e ui o loo tālia pea se iuga mai le faamasinoga maualuga, o loo tapena pea le Malo tausi mo le isi faigapalota ma o se auala lea e fesootai nisi o vaega ma tagata Samoa ae o lea o le ā tapunia. na ia taua foi “o se tulaga ogaoga , ma ua leai lava se avanoa e toe tuuina mai i le aia tatau masani e tatau ona ofoina mo samoa, faapea foi mo tagata taitoatasi e fai ma auala e saofagā ai lo latou aiā tatau.”
E mautinoa foi a ono taunuu lenei gaioiga mo se taimi, o le a telē le aafiaga o tupe maua ma le aiā tatau a pisinisi e faaoga ai tekonolosi faaonaponei.
Peitai i le afiafi o le Aso toonai na te’a nei na tuu mai ai se faasalalauga mai le Vaega faaupufai e puipuia aiā tatau a tagata lautele le HRPP i luga o le Facebook e teena ai nei faamatalaga ma e leai se fuafuaga faapea a le Malo Tausi.
E ui o lea na tau aafia le aiā tatau o tagata lautele e ala i fuafuaga o le tapē ai o le social media ae ua faafetaia le faasalalauga a le HRPP ua faamaonia ai ua lē taunuu se fuafuaga e tapunia ai le Facebook i Samoa.
