Ua ave le lagolago a le malo i tapenaga a le tamaitai o Haylani Pearl Kuruppu ua avea ma sui tauva o le tatou atunuu i le tauvaga e saili ai se tausala o le atulaulau le Miss Universe lea e faia i le masina o Novema o le tausaga nei i le atunuu o Mexico.
O le lagolago a le malo na faailo e le Sui Palemia le afioga Tuala Tevaga Iosefo Ponifasio i le sauniga na faapale ai le tamaitai o Haylani e avea ma Tausala o Samoa o le atulaulau le Miss Universe Samoa.
Ua 30 tausaga e lei toe auai se sui tauva o Samoa i lea tauvaga e tausinio ai tamaitai o atunuu eseese o le lalolagi.
Faaalia e le Sui Palemia i lana saunoaga i le faapaleina o le sui tauva o le atunuu, o le tauvaga ia Novema o se isi avanoa tāua e faalauiloa ai Samoa i le lalolagi ma avea o se faitoto’a o faalauiloa o le atina’e o tagata e fia tafafao mai i Samoa.
O lea foi tauvaga tele a le lalolagi e pei ona faaalia e le Sui Palemia, o se isi o taumafaiga maualuga ua faama’ite e le vaega o auaunaga tau pisinisi tuma’oti i le atunuu poo le private sector.
E 130 tamaitai o le a tausinio faatasi ma le sui o Samoa i le tauvaga o le a faia i le aso 16 o Novema.
