O Samoa le atunuu laitiiti o le li’o o Malo o le Taupulega ua amata ai se tasi o taumafaiga, o se polokalame e puipuia ai ma faasao le siosiomaga mai otaota o uga poo plastics e lafoa’i.
O taipa poo diapers i le gagana peletania o loo faaaogā mo pepe ma fanauiti o se tasi lea o oloa o loo gaosia mai le uga ma o ni otaota pito i taatele ia ua vaaia i soo se atunuu laitiiti e pei o Samoa.
O faamaumauga o loo faailoa ai e tusa ma le 860 miliona taipa e faaaogā i pepe ma fanauiti i atunuu o le Pasefika i totonu o le tausaga.
O se aofa’iga tele na’ua ona o le alumia i le faatau ma faaaogā ona e tupu pea ma ola tagata fou e ala i pepe fananau.
O ni otaota foi ia o loo faatupula’ia ma afaina ai le saogalemu o le tatou siosiomaga.
O loo i Samoa se ‘aumalaga o ni tagata mai Peletania o loo lotolotoi i se polokalame o loo faalauiloa ai i le itupa o tinā le faaaogā o se ituaiga fou o taipa mo pepe ma fanauiti e mafai ona faapala pe a uma ona faaaogā ona maua ai lea o le palapala lelei e totō ai laau.
O le faai’uga o le vaiaso na oo atu ai i Poutasi Falealili sui o lea polokalame mo le faalauiloaina o lea auala poo se metotia fou.
O le tasi lea o nuu ua amata ai lenei taumafaiga faatasi ai ma le afio’aga o Moataa.
O le atunuu o Saina o loo gaosia ai le ituaiga o taipa fou o loo faalauiloa i lea polokalame ua gaosi i le silasila mamao e mafai ona toe faaaogā e pei ona ave e faapala ae maua ai le eleele lelei mo laau totō.
O lea polokalame o loo fuafua e faaoo atu i atunuu laiti uma poo small Island States o loo avea ma sui o Malo o le Taupulega ma o se tasi o fuafuaga na faalauiloa i le fono tele sa usuia i Samoa i ni vaiaso e le’i mamao atu.
O loo aofia ia i latou mai fafo o loo aumaia lea polokalame le tamaitai o Sarah Ferguson sa nonofo ma Pelenise Anetelea o le Aigatupu o Peletania.
