O le nofoaga o a’oa’oga tau matātā eseese i totonu o le Iunivesite Aoao a Samoa, o le a’oga o matātā eseese a le ekalesia Metotisi le Laumua o Punaoa i Faleula, ma le a’oga o matātā eseese a le Ekalesia Katoliko le Don Bosco i Alafua, ua avea nei ma nofoaga e a’oa’oina ai tomai tau inisinia mo taavale e ola i le eletise.
Ua faailoa lautele mai lea fuafuaga i le mae’a ai o se a’oa’oga na aga’i tonu i le a’oa’oina o faia’oga inisinia o afi o taavale e ola i le eletise lea o le a tauaao iai o latou tusipasi i se sauniga i le Aso Lulu o lenei vaiaso, e faia i le Iunivesite Aoao a Samoa.
O se tasi lea o laasaga o le polokalame o loo una’ia ai le faaitiitia o kasa kaponi e puaina atu i le osone ma faatuputeleina ai le vevela o le lalolagi.
O se polokalame o loo fesoasoani iai le malo o Iapani sa aumai ai taavale e ola i le eletise i lalo o lea polokalame.
O taavale e 76 na aumai ai, ua mae’a ona faasoasoa i matāgaluega ma auaunaga eseese a le Malo.
Ua faailoa i se pepa o faamatalaga mai le ofisa o le faalapotopotoga o atina’e a Malo Aufaatasi le UNDP i Apia, o le faamoemoe autū o le a’oa’oina o alo ma fanau i tomai tau inisinia mo afi o taavale e ola i le eletise ina ia mafai ona siitia ma faaleleia auā o le itu mautinoa, o le tasi lea o tomai mana’omia i galuega tau inisinia o afi o taavale i totonu o Samoa i le lumana’i.
O le amatalia ai o le a’oa’oina o lea matātā mo galuega inisinia o afi o taavale sa faalauiloa aloa’ia e le ta’ita’i o le malo le afioga i le Palemia, Fiame Naomi Mataafa, i se sauniga na faia i le a’oga o matātā eseese o le Don Bosco i Alafua.
