E silia ma le 1 miliona tala le fesoasoani a le Malo o Iapani ua tuuina atu i nisi o aoga a le atunuu mo a latou fuafuaga faalea’oa’oga.
O Aoga Tulaga Lua a Samalaeulu, Gataivai, Mulifanua ma Fusi faatasi ai ma le Kolisi maualuga a Lepa ma lotofaga ua faamanuiaina i le foai a le malo o Iapani e pei ona maea faamautu i se sainigalima ma le sui o lea malo i le atunuu.
O le tupe atoa o le a faamatuu e lea malo e fesoasoani ai i ia aoga e silia ma le $1,889,314.00 tala. O le aoga tulaga lua i Samalaeulu o le a fausia le faletele (hall) mo meafai a le aoga, mo le aoga i Gataivai o le fausia lea o se faleaoga fou i seisi nofoaga fou o le a siitia iai, o le aoga tualgalua i Mulifanua o le toe faafouina o potu ma fausia nisi potuaoga faaopoopo, o le aoga i Fusi o le fausia o se faaopoopoga fou o le faleaoga ma faatau ai ni tane vai, ma le Kolisi i Lepa ma Lotofaga o le a fausia foi se hall fou mo lea kolisi.
O le sui faipule o le Itumalo o Lepā o le taitai foi lea o le Ituagai, susuga Tuilaepa Lupesoliai Sailele Malielegaoi o ia foi o le Peresetene o le Kolisi maualuga na ia sainia le maliega e faamautu ai le fesoasoani.
O lea ua faailoa foi e le ofisa o le Malo o Iapani i le atunuu o le masina amata o le tausaga fou 2022 e tatala ai talosaga mo ana fesaosoani e tauala atu i lana poloakalame tau atinae e siitia ai le soifua lelei o tagata lautele.
