O le 80 pasene o le aufaipisinisi laiti o loo faaaogāina o tatou maketi i Salelologa i Savaii, ma maketi i Fugalei ma Savalalo o le itupa o tina ma tamaitai.
O le mafuaaga lea o le tuusa’o o se foai a Malo o Niu Sila ma Ausetalia faapea le faalapotopotoga o tamaitai ma tina o Malo Aufaatasi, i le faatauina o mea pueata poo CCTV cameras e faapipii i vaega eseese o ia maketi, ina ia mataitu ai le saogalemu o tina ma tamaitai o loo faafoe a latou pisinisi i ia maketi ma malu ai foi le puipuiga o a latou meatotino.
E lē gata o ia mea pueata ua faatau, a o isi masini e pei o faaleo tele leo o nofoa ma laulau faapea masini komepiuta laiti.
O le tau atoa o lea foai e tusa ma le 4 miliona tasi le selau afe tala Samoa.
O le tatalaina o le aso faavaomalo o tina ma tamaitai i nuu i tua poo rural women a Malo Aufaatasi, na faia ai lea foai ma avea ai le Komesina Maualuga o le Malo o Ausetalia e saunoa e faafetaia le matagaluega o tina ma tamaitai, atinae o afioaga ma agafesootai ona o le tulaga lelei o atinae a tina ma tamaitai i nuu i tua ua molimauina i se asiasiga i le tausaga na tea nei i le nuu o Siutu i Savaii, o se tasi o afioaga o le itumalo o le tamaitai Minisita o Tina ma Tamaitai le afioga Mulipola Anarosa Ale-Molioo.
Le Minisita o Tina ma Tamaitai atinae o afioaga ma aga fesootai le afioga Mulipola Anarosa Ale-Molioo i le tatalaina o le aso faavaomalo o tina o loo faia le tautua o atinae tau pisinisi i nuu i tua.
