Ua iai le suiga i faiga faavae ua ta’ua o le fast-track residency policy poo le lisi ua ta’ua o le Green List, ma ua faaopoopo iai le isi 32 avanoa faigaluega a le vaega o le soifua maloloina.
Fai mai le Palemia Chris Hipkins ua moomia nisi tagata e iai tomai ma agavaa mai atunuu i fafo.
O avanoa faigaluega nei o le a agavaa i le faiga o loo vave ai ona maua avanoa nofomau i totonu o Niu Sila ma e aofia ai tausi soifua, foma’i fa’inifo, fomai e vaaia mata, tagata e iai le tomai e galulue i faletalavai, tagata galulue i fā’ata faapea paramedics poo i latou nei e mafai ona vave tali mai i taimi e moomia vave ai le fesoasoani.
O le tuu iai o le 32 na faailoa mai i le mae’a ai o le fono a le Kapeneta ananafi ua atoa ai nei le 48 avanoa faigaluega agavaa a le soifua maloloina i lalo o le faiga e vave maua ai o latou avanoa nofomau.
I faamaumauga i totonu o le masina o Mati lava ia e latalata i le 900 tausi mavaega na faatalosaga mai e fia omai e galulue i Niu Sila.
Fai mai Hipkins, ua faalogo le malo i le soifua maloloina ma o suiga nei ua faia se’i fesoasoani i le utiuti o le au galulue.
O loo lagolago e le pati a le Nationals le faaiuga a le malo ua iai nei, peitai ua fai mai ua leva na tatau ona fai.
