Ua amata tuli nei le faasalaga e 20 tausaga ma le ono masina i le falepuipui o se tamā ua 48 nei tausaga o lona matua, ina ua faamaonia ona moliaga e 6 o le faiaiga faamalosi i lona afafine moni ua maliu.

E tusa ai ma faamaumauga a leoleo na tuuina atu i le faamasinoga mai le tausaga e 2014 na amata ai ona faatino solitulafono tau faiaiga faamalosi a lē ua molia e oo i le tausaga e 2018 ua tusa ma le 4 tausaga talu ona tupu, ae faato’ā oo le mataupu i leoleo i le tausaga e 2018 ma faia ai loa suesuega.

Mai lena taimi e oo mai i le tausaga nei o le masina o Me na faato’ā suesue ai molimau a leoleo ma taunuu ai iloiloga a le Faamasinoga Maualuga i le faamaonia o solitulafono.

O le afafine o lē ua faasalaina na aafia i le solitulafono na maliu i le tausaga e 2019 ma o se tasi lenei o mataupu tau faamasinoga na umi se taimi o tolo.

O se tasi aafiaga o le teineititi na aafia i le solitulafono a lona tama o le fafano o lona ma’itaga.

Ae i iloiloga a mau na tuuina atu ma mau a lē ua molia sa ia matua teena ai moliaga ma lana faamatalaga e mamā o ia mai tuua’iga. 

Peitai i se mau tusitusia a le teineititi na aafia sa tuuina atu i leoleo ma ua faamauina i mau na lagolago ai moliaga, o loo faaalia ai e lē na aafia a o lei maliu. 

“O le taimi nei, o lo’o ou faalogoina lava le pepē o o’u tino, tiga totonu o lo’u manava, ae o isi taimi ua tau le kilia la’u vaai. O le taimi nei foi e lē mafai ona galo le mea a lo’u tamā lea sa fai ia te a’u, ae fai ana mea leaga ia te a’u”.

I le faai’uga a le afioga i le Faamasino Sili ua faatonuina ai le tusia ma lesitala o le suafa o lē ua molia i le lisi o tagata ua faamaonia solitulafono tau feusua’iga poo le sex offender register.

O le 20 tausaga ma le ono masina o le faasalaga o le a toese ai ni masina ma ni vaiaso sa nofo taofia ai lē ua nofosala nei i le falepuipui.