O se tasi o kulupu mai le Iunivesite o New Castle mai Ausetalia o le a galulue soosootau’au i Samoa nei ma nisi o Matagaluega a le Malo, iunivesite ma nisi o ofisa.
E pei ona faailoa ai e le upega tafailagi a le Ofisa o le Hai Komesina a Ausetalia i Samoa nei le oo atu ai o i latou nei e feiloai ma sui o le ofisa.
O le kulupu lenei o loo tauala mai lea i se tasi o fesoasoani a le Malo o Ausetalia le New Colombo Plan lea e lagolagoina ai fanau o loo aotauina i faailoga maualuluga e galulue ai i le Pasefika.
I le lua vaiaso o lumanai nei o le a feagai ai ma Matagaluega o Siosiomaga, Matagaluega o Faatoaga ma Faigafaiva, ofisa o polokalame tau le siosiomaga a le Pasefika le South Pacific Regional Environmental Programme (S.P.R.E.P.), Ofisa o Suesuega Faasaienisi le Scientific Research Organization of Samoa (S.R.O.S.) faapea ai ma le Iunivesite Aoao o Samoa i suesuega i vaega tau microplastics.
O le manulauti o lenei poloketi ina ia faalauaitele le tomai o le ausaienitisi i suesuega e ala lea i le faatautaia o ni sailiiliga i le gataifale ma matafaga i Upolu.
O faamaumauga uma o le a maua mai i lenei sailiiliga o le a lagolagoina ai le Malo ma ana paaga auā le tali atu i faiga faavae ma le puleaina o le saogalemu o le siosiomaga.
