O le aso 23 o Aokuso e tapunia ai le avanoa mo tagata uma o le Pasifika lea o loo agai mai i galuega faavaitaimi e tuuina atu ai ata o a latou atina’e sa faatinoina i totonu o latou aiga i atunuu o loo malaga mai ai e faailoa ai le tāua ma le tele o le sao o nei polokalame o galuega faavaitaimi o loo malaga mai ai i Niu Sila nei.
O se polokalame ua mafai ona tuufaatasia e le New Zealand Agriculture e agavaa ai soo se tagata o le Pasifika e ala lea ia latou atina’e.
E pu’e le ata o le atina’e a le tagata latou i lona aiga i le atunuu o loo aumau ai ona tuuina atu lea i luga o upega tafailagi a le RSE e silasila iai le New Zealand Agriculture i le tagata ma lana taumafaiga i lona aiga i tupe ia e maua atu i polokalame a le RSE poo galuega faavaitaimi.
E tusi le suafa o le tagata i le ata o lana atina’e faatasi ai ma le igoa o le kamupani o loo galue ai ona tuufaatasi lea i luga o le tauvaga.
O le aso 28 o Aokuso e fai ai le fonotaga a le RSE i Tauranga ma fofogaina ai loa igoa o i latou o le a manumalo i lenei tauvaga faatasi ai ma le kamupani o loo galue ai.
E telē le sao ma le tāua o lenei polokalame mo tagata o loo auai i galuega faavaitaimi ina ia mafai ona agai mai ma galulue mo se lumanai manuia o aiga o loo faatali mai i Samoa.
Ma o le sao tāua foi lea o loo taumafai iai le susuga ia Laufiso Tomasi e uuna’ia ma fai fonotaga i vaega eseeese o loo iai le augalulue ina ia siaki lava poo lelei ma maopoopo le faatinoina o galuega auā le manuia o tatou tagata.
