Ua faamauina e le Malo o Samoa lana faafetai i le Malo o Niu Sila e tauala mai i fuafuaga a le faigamalo talu ai a le tamaitai sa avea ma Palemia o Jacinda Ardern, i le 15 miliona tala tupe Niu Sila e fesoasoani ai i polokalame o suiga o le tau.
Na afua mai lenei fesoasoani e pei ona faailoa e le Minisita o Tupe le afioga Lautimuia Uelese Vaai i le tala faaopoopo muamua o le tupe, i se malaga na asiasi mai ai lea taitai o le Malo o Niu Sila i le tausaga e 2022.
O le tasi le miliona 2 selau afe o lea 15 miliona ua mae’a ona faailoa i le tala autu o le tupe o le tausaga faaletupe o loo faagasolo i le taimi nei, ae o le isi 13 miliona 5 selau afe tala Niu Sila o le a faagaga ma faaaogāina i le tausaga faaletupe fou e lagolago ai galuega a le Malo e tali atu ai i suiga o le tau ina ia mausali ma lava tapena ai le atunuu i ni aafiaga e ono tutupu mai.
