E oo atu i le $100,000 le taui tupe ua ofoina mai i tagata e fesoasoani atu i suesuega a leoleo o loo tau sailia pea le tamaitai 27 tausaga ia Jessica Boyce.
O le aso 19 o Mati o le tausaga 2019 le aso mulimuli na vaaia ai Jessica i le taulaga I Marlborough, a o ia aveina le taavale a lona tina, lea na maua mulimuli ane, ae ua leai Jessica.
Na amata suesuega o lea mataupu, faapea o se tagata oloo tau sailia peitai na suia lea mulimuli ane, ma faamauina ai o lea tamaitai ua masalomia ua faaoo iai e se isi le oti.
O le aso ananafi na faailoa mai ai e leoleo e tusa ma lipoti a le Herald e oo atu i le $100,000 le taui ua ofoina mai e leoleo i soo se tasi e fesoasoani atu i sailiiliga o loo faia nei.
O i latou foi e fesoasoani o le a faamausalīe le Komesina o Leoleo le aofai o le tupe e tuuina atu iai, ma e fua foi le tele o le fesoasoani i luga o le numera o i latou ua agai atu e faailoa a latou mau i lea mataupu.
A o iai fuafuaga o lenei ofo, ua māua i faamatalaga e toaiva tagata o loo masalomia i le taimi nei, ma o le toatele o i latou e nonofo uma i Marlborough.
