Ua tula’i nei i luma o le faamasinoga se alii 49 tausaga le matua i lona ave faagaoi ai o se taavale a se tasi o tagatānuu o Kaiwaka.
I lipoti na faamatala ai, poo le ‘afa o le itula e lima i le vaveao o le Aso Gafua na faalogoina ai e le tagatānuu o lea faaitu o Kaiwaka, ua ola lana taavale sa tu i fafo ane lava o lona fale.
E oo mai lea alii i fafo ua alu ese le taavale, ma o lea na logoina ai loa ma leoleo.
Faamauina na vave ona tali ane malu o le malo ma na fesoasoani ai le vaalele le Eagle Police e sa’ili le itu ua aga’i iai le taavale.
Māua i lipoti, na tuliloa atu e le Eagle ma maua o le a aga’i i Wellsford.
Na faaauau ona tuliloa ma mataituina e le vaalele a leoleo le taavale ao agai atu i itu saute, sa mafai ona faatino e le vaega a le Waitematā North Area Response team nisi o metotia le spike e taofia ai le taavale i Makarau.
Ma i le faatino ai o ia gaioiga na mafai ona tu le taavale i Kaipara Coast Highway.
Ta’ua i le tu ai o le taavale na sola ese lē na gaoia le taavale aga’i i le vaitafe le Makarau River.
Na mafai ona maua e le Delta le alii ma mafai ai ona saisai ma taofia e leoleo.
Faaalia e le’i tetee pe faafiufiu lē ua taofia i le taimi na maua ai e leoleo.
Na tula’i lea alii i luma o le Faamasinoga Faaitumalo o North Shore ma ua molia nei o ia i le moliaga o le ave faasolitulafono ai o se taavale, ma le tauaveina ma le lē saogalemu o se taavale.
O loo taofia pea o ia i lalo o le vaavaaiga a leoleo, e tālia ai lona toe tula’i i luma o le faamasinoga i le aso 2 o Oketopa.
Puna o Faamatalaga: https://www.facebook.com/share/p/19JqYHogQn/
