Ua faamauina i talafaasolopito, le mae’a ma le manuia o se tasi o poloketi tele a le faalapotopotoga i Niu Sila nei, le Central Pacific Collective (CPC) – o le mae’a fausia ai o fale e 18 i le itu i Sasa’e o Porirua i Ueligitone – o se fuafuaga o loo faatautaia e tauala mai le atina’e ua ta’ua o le Our Whare Our Fale Development.
O se matāti’a le mafai ona faataunuuina lea polokalame fesoasoani i aiga Pasefika, a o le’i mae’a le taimi faatulagaina sa tatau ona faame’aina ai lea galuega.
E lē gata i lea ae na mafai ona faatino foi e aunoa ma le tele o se seleni e alu ai (ahead of schedule and under budget).
I se pepa o faamatalaga mai le CPC, na ta’ua ai o nei fale fou, na mafai ona galulue ai tagata Pasefika mo ona tagatānuu e mauaina ia fale; ma ua faia i se tulaga e atagia atu ai faasinomaga ma tulaga faaleaganuu.
Ta’ua o se taumafaiga ina ia mausalī ma maua pea e tagatānuu Pasefika le agaga o le galulue faatasi ma le feoeoea’i; e faaalia ma faapupula atu ai tū ma aga faaleaganuu. Faaalia foi o se taumafaiga e lagolagoina ai pea le nonofo leleli mai lea augātupulaga i lea augātupulaga.
Faamanino e le faauluuluga o le CPC, Faamatuainu Tino Pereira, o le mamanuina ma le galuea’iina o nei fale o se faamoemoe e momoli mai ai se fe’au tāua.
E lē faapea o fale ae o le ‘anofale e tusa ai ma muāgagana a le atunuu.
O se faamanatu e momoli, e lē faapea o le fale ae o mafutaga i le va o tagata o loo nonofo i totonu o fale ma o latou sootaga.
O lenei poloketi tele na faia e tauala mai i se faigāpaaga ma le Ngāti Toa Rangatira, e pei ona latou tuuina mai le fanua e faatino ai le galuega.
I le faamatuuina ai o lenei fanua ua mafai ona fetuuna’i se tau pa’ū maualalo mo le lisi.
Ua lagolagoina e sui o le laulauafono o ia faaitu i Porirua lea galuega tele ma ua māua foi le maua ai o fesoasoani tupe mai le malo i le paketi o le tausaga e 2022; e pei foi ona faatino ma faia i lalo o le faamalumaluga a le Ministry for Pacific Peoples.
E faamauina o le fausiaina na faatino lava e tufuga Pasefika ma le vaega o le South Coast Construction.
Faaalia le agaga fiafia o aiga ua faamanuiaina i nei fale, ua latou ta’ua o le maua ai o nei fale o se atina’e o se vaega ua mautū ai ma maua ai se faamoemoega ola i o latou tagata aemaise o le saga atiina a’e o le sootaga va lelei ma isi uso a tagata.
Faamanino o le Vaega 1.2 & 1.3 ua amata faasolo nei, e 32 fale ua amata fausia.
Puna o Faamatalaga: Central Pacific Collective- Media Release
