O loo tuua’ia e le Minisita o le Va i Fafo a Niu Sila o Winston Peters tagata mai fafo e afua lea i ni feeseesea’iga i le fonotaga a ta’ita’i o le Pasefika le Pacific Islands Forum.

Ta’ua e Peters o outsiders poo tagata ia mai fafo ua o latou faailoa atu foi ia i latou tagata latou te manana’o e fai ma valaaulia peitai e lē o le auala lea a le Pasefika.

O loo iai i le taimi nei Peters ma ta’ita’i o le Pasefika i le fonotaga a Minisita o le Va i Fafo a le Pasefika i Suva ae ua mae’a faafofoga le Pasefika i se faamatalaga mai le Palemia o Solomona, Jeremiah Manele na ia ta’ua ai e lē tatau ona auai nisi paaga a le Forum i le fonotaga o le a faia i Honiara.

O le faamatalaga la a Peters pei ona lipotia i le RNZ ua ta’ua ai, e ao ona faamautinoa o soo se outsider e auai i fonotaga ia o se tagata faaaloalo ma iloa tonu tagata o loo auai i le fono.

E lē o malilie uma ta’ita’i o le Pasefika i le finagalo faaalia o Manele, ae manatu Peters o le itu tāua o le faamautinoa o mea o loo ave iai le faamuamua a outsiders e lē o taomia ai lagona ma manatu o le Pasefika.  

Puna o Faamatalaga: https://www.rnz.co.nz/international/pacific-news/569944/winston-peters-blames-outsiders-for-pacific-islands-forum-tensions