O le tama’ita’i loia le tofa Unasa Iuni Sapolu o le a finauina le itu a le tofa Tuiloma Tusa Laniselota Lameko faasaga i le talosaga ua faaulu e loia a le vaega faaupufai e puipuia aiā tatau a tagata e fia auai e faalavelave poo se intervener i le tagi tau palota mai le itumalo o Falealili 1.
O le Aso Lua o lenei vaiaso na toe fofogaina ai le talosaga fia auai e faalavelave a le patī faaupufai o loo agaia le malo ma ua faatonuina ai loia a itu auai ina ia faaulu atu uma finauga poo submissions ma nisi faamatalaga tusitusia e aga’i tonu i le finauga a o le’i tāina le 4 o le afiafi o le Aso Lulu o le vaiaso nei.
O le Aso Tofi o le vaiaso lenei e su’esu’e ai lea talosaga ma a mae’a ma aumai se faai’uga, ona faato’ā iloilo ai lea o talosaga mo le toe faaui i tua o le tagi tau palota mai lea itumalo, lea o loo avea ai le Sui Palemia ma o latou tofi Faipule i le Palemene ma sa toe filifilia i le faigāpalota tele i le faai’uga o Aokuso.
O le sui sa tauva mo le itu faaupufai o le H.R.P.P. le tofa Tuiloma Tusa Laniselota Lameko na faauluina le tagi o moliaga o faatosina solitulafono faasaga i le sui Faipule, ae o loo iai foi moliaga a le afioga Toelupe Maoiautele Poumulinuku Onesemo faasaga i lē ua tagi.
