I le 45 o molimau e lagolago ai moliaga o le tagi tau palota mai Falealili 1, e na o le to’atasi le molimau na usita’ia le faatonuga a le faamasinoga i le tatau lea ona oo atu i le su’esu’eina o moliaga o faiga faaālatua na faaulu e le tofa Tuiloma Tusa Laniselota Lameko, o se sui sa tauva mo le nofoa o le itumalo i le fu’a a le vaega faaupufai e puipuia aiā tatau a tagata.
O le tali a le loia mo le itu tagi o lē na faauluina moliaga, sa iai fesoota’iga uma ma molimau, ae o ia na pau le taimi na feutaga’i ai ma molimau o lona ofisa a o tapena faamatalaga o molimau tusitusia.
O le lē oo uma atu o molimau a le itu tagi i le taeao o le Aso Gafua na faatulaga e su’esu’e ai lea matāupu o se tagi o le palota, na toe tolo i le 2 i le aoauli ma le fautuaga a le faamasinoga i le loia a le itu tagi e tautuana molimau e logo ina ia oo atu.
Na toe valaau le tagi tau palota mai Falealili 1 i le aoauli, e leai lava ni molimau na oo atu se’ia vaganā le molimau e to’atasi, o ia lea e molimau e lagolago se mau autū i le tuuina atu o se tupe e 150 tālā e se tagata o se sui e lagolago ia Tuiloma ma le faamoemoe e faatosina ai le palota.
Sa finau le loia a le itu a le faipule o loo molia e na te lē su’esu’eina ma fesiligia le molimau ona o se mau e faavae mai i ni tala faalogo poo le hearsay evidence.
O le finau foi a le loia a lē ua molia sa tatau ona oo atu le molimau autū.
I lea vaega o taualumaga a le faamasinoga o palota ua tuu atu ai nei i le Aso Tofi e faia ai folasaga faai’u a loia ma le faasinomaga ua ave iai e le Faamasino Sili i vaega e tolu e faavae ai a latou finauga.
Muamua o le selau afe tālā na aafia i le fetuuna’iga e ave i tua le tagi tau palota, ona ua faailoa e le faamasinoga e faaono tuuina atu lea gaioiga i le Loia Sili mo le faia iai o se su’esu’ega a leoleo.
Lona lua ia tuuina atu ni finauga i le faalavelaveina o molimau, ma le lona tolu o le lē usita’ia lea e molimau o le faatonuga a le faamasinoga poo le contempt of court.
O molimau uma a le itu tagi e le’i oo atu o nisi ua malaga i fafo, o nisi ua maua tusi samania e oo atu ai i le faamasinoga, o isi na valaau suafa e leoleo ae sa lē oo atu.
O le a tālia ia folasaga a loia i le Aso Tofi ona iloa ai lea o se aso e aumai ai se faai’uga a le faamasinoga o faigāpalota i le matāupu mai Falealili 1.
