Ua faailoa ai nei e le ofisa sooupu a le malo le filifilia o se Ofisa Sili fou mo le pulega o tagata tafafao mai i Samoa, ina ua talia ai e le Komiti Faafoe o lea pulega le faamavaega a lē sa tauaveina lea tofiga le faletua le afioga Toleafoa Pativaine Petaia Tevita.
O Fepuari o le tausaga nei na faamālōlō lē tumau ai i se faai’uga a le Komiti Faafoe o le pulega o tagata tafafao le afioga Toleafoa e mafua ona sa iloilo le faatinoga o ona tiute faatino i lona tulaga o le faauluuluga o lea auaunaga a le malo.
Ua lima masina o faamālōlō lē tumau lē sa avea ma Ofisa Sili se’ia oo mai i le masina lenei o Aokuso e mae’a ai lana konekarate e 3 tausaga.
Photo: Government of Samoa
O le toe faasalalau ai o le avanoa ua faailoa ai ma le filifilia o le susuga Niumata Kitiona Pogi sa avea ma se tasi o Ofisa Sili lagolago o le pulega o tagata tafafao, e avea ma Ofisa Sili fou.
Ua sefulu tausaga o galue lea tamalii i le pulega o tagata tafafao ma sa faauluulu ia te ia le vaega o faamaumauga ma su’esu’ega a o le’i filifilia e avea ma Ofisa Sili mo le 3 tausaga i aiaiga faakonekarate e pei o isi Ofisa Sili o matāgaluega ma faalapotopotoga a le malo.
O loo umia e le susuga Niumata Kitiona Pogi faailoga maualuluga e pei o le Bachelor of Commerce mai le Iunivesite o Waikato i Niu Sila ma o se tasi sa a’oa’oina i a’oga i le atunuu e aofia ai le kolisi maualuga o Sagato Iosefo.
E to’afitu i latou sa talosaga i le avanoa o le Ofisa Sili o le pulega o tagata tafafao le Samoa Tourism Authority.
