O le itumalo o A’ana aga’i atu i Falelatai ma Samatau faapea le itumalo o Lefaga ma Faleaseela, aemaise o Safata ua iai nei le fuafuaga o le a latou maua le tautua a le pulega o le tineimu ma faalavelave faafuase’i, pe a mae’a fausia le nofoaga mo lea auaunaga ua faatūina i totonu o le itumalo o A’ana.
O le Aso Lua o lenei vaiaso ua faamauina nei o se aso tāua i le talafaasolopito o lea auaunaga a le malo ua suaina ai le eleele e faailoga ai le amata aloa’ia o le galuega e fausia ai lea nofoaga o le tineimu ma tautua i taimi o faalavelave faafuase’i.
O le tama’ita’i Palemia o le malo tausi sa saunoa ai ma suatia le eleele e aloa’ia ai le galuega o le a faatupe lava e le tatou malo, o se vaaiga na faaalia e le Palemia ua atagia ai pea le naunauta’i o le faigāmalo e faasopolia auaunaga talafeagai i soo se tafa o le atunuu, ma ia mautinoa le soifua lelei, soifua mālōlōina ma saogalemu o Samoa.
Se vaega o le saunoaga a le Palemia o le malo tausi ma le tofa Vaili i le suaina o le eleele e aloa’ia ai le fausia o le nofoaga fou mo le tineimu ma faalavelave faafuase’i i totonu o le itumalo o A’ana.
