Ua oo atu i le to’a 17 tagata ua faaoo iai le oti i lenei tausaga i totonu o Singapore ona o soligatulafono ma o se aofa’iga aupito maualuga lea ua oo iai le ‘au maliliu i tulaga faapea talu mai le 2003.
Ua lipotia e le BBC o le vaiaso na te’a nei e to’atolu na faaoo iai le oti ona o moliaga tau fualaau faasāina ma o loo faatalia pea se lu’i sa faia faasaga i le faavae o le atunuu i le faasalaga oti ona o moliaga tau fualaau faasāina.
O se tasi lenei o atunuu aupito i malosi ana faasalaga mo tagata e solia tulafono i fualaau faasāina ma o loo maumaua’i pea le faigāmalo a Singapore o le aveesea o le faasalaga oti mai le tulafono o le a oo ai le atunuu i nisi tulaga e faigatā atu.
E tuuina foi le faasalaga oti i moliaga e pei o le fasioti tagata ma le ave faamalosia o se tagata ae foliga o le matāupu lava lea ia i latou e aafia i fualaau faasāina o loo faaseā ai tagata e lē tatau ona aofia ai ma le faasalaga oti.
Fai mai le malo o le faaauau pea o le faia o le faasalaga oti i matāupu ia ua fesoasoani i le avea ai o Singapore ma se tasi o atunuu aupito saogalemu i le lalolagi.
Puna o Faamatalaga: https://www.bbc.com/news/articles/c8dymv623q0o
