Na tolo i le 2 o le aoauli o le Aso Tofi (ananafi lea i Samoa) su’esu’ega a le faamasinoga o faigāpalota i le talosaga a le vaega faaupufai e puipuia aiā tatau a tagata e fia auai i le fofogaina o le talosaga e ave i tua le tagi tau palota mai Falealili 1, ina ua faafuase’i ona tuuina atu i le taeao na amata ai lea faamasinoga le tusi mai le sui faipule o le H.R.P.P. le tofa Namulauulu Papalii Sami Leota Papalii sa ia talosaga ai e lē fia tula’i e molimau i le māfua’aga o le fia auai o lana vaega faaupufai e pei ona faatonuina e le faamasinoga e oo atu mo sana molimau e faailoa ai le māfua’aga o le fia auai o le latou patī faaupufai.
Ina ua tula’i Namulauulu mo sana faamatalaga ina ua tāpā e le afioga i le Faamasino Sili, sa ia faailoa e lē fia aafia i le tagi tau palota ma tulaga ua oo iai ona taualumaga, sa ia faailoa ai foi o lana aiā tatau lea e pei ona lē fia molimau.
Peita’i na faailoa iai e le Faamasino Sili le afioga Satiu Simativa Perese, e lē toe iai sana aiā tatau ona ua faatonuina e le faamasinoga lona auai atu i su’esu’ega.
Na ioe le sui faipule ina ua faailoa iai e le Faamasino Sili o ia o loo saini i le faamatalaga tusitusia ua tuuina atu i tapenaga a loia o loo finauina le talosaga fia auai o le patī faaupufai e puipuia aiā tatau a tagata.
