Ua folasia nei e le Faamasinoga Faaitumalo a Nelson le i’uga i le matāupu ua molia ai le alii Samoa o Ralph Smith, e 29 tausaga le matua.
O lea talavou ua molia i le avetaavale onā ua māfua ai ni manu’aga i le aafia ai o lona uso sa o la iai i totonu o le taavale na aveina e lea alii.
O lenei matāupu na tula’i mai i le aso 22 o Iuni o le tausaga nei, ma e tusa ai ma faamatalaga o lenei matāupu, e fai lava sina maualuga o le fua na oo iai le tulaga o le faasuā’avā o Ralph a o ia tagofia le foeuli, māua pe faatoluina le maualuga pe a faatusatusa atu i le fua faatatau i le faasuā’avā o le tagata i lalo o le tulafono e na te aveina ai se taavale.
Ta’ua i lipoti mai le NZ Herald, sa auai lenei auso i le faamanatuina o le aso fanau – o le 60 tausaga o se tasi o o la tauaiga.
O lea na māua le taumafa ‘ava ai o lē ua molia, e mātauina le oo atu i le 7-8 fagupia na taumafaina.
Poo le itula e lima i le vaveao na aga’i ese ai loa Ralph ma lona uso i le taavale, ma o i lea na aafia ai loa i la’ua.
Ta’ua na lavea le taavale ina ua tifa le taavale ma soso’a se isi taavale i lona ituaiga o le trailer o loo paka i Main Rd, Stroke.
I le mata’utia tele o lea faalavelave tau taavale, na faamauina ai le tigāina o le uso na malaga faatasi atu ma lē ua molia, talu ai foi e le’i faia le fusipa’u a lea uso ma o lea na aafia ai lona maeaario ma aafiaga tugā i totonu o lona tino (critical spinal and internal injuries).
Ta’ua i lipoti le avatu faanatinati i le helikopa o le uso mo togafitiga i le falema’i i Ueligitone.
Māua ua faasolosolo manuia lea alii, ma ua toe foi nei i Samoa.
Na ioe Ralph Smith, na ia iloa lava ua faasuā’avā e na te aveina ai se taavale.
Sa tuuina atu se finau a le loia a Ralph ina ia faamaonia le moliaga o lenei alii ae ia aua ne’i faamauina, peita’i na lē talia e le faamasino lea talosaga, ae faasala mo le 5 masina e faia ni galuega mo tagata lautele, ma le sā ina ia lē mafai ona ia fealua’i mai le vaeluaga o le po poo le 12 i le vaveao aga’i atu i le 12 i le aoauli o le isi aso.
O loo iai foi le tuutuuga e tatau ona totogi atu e Ralph le $500 mo nisi o vaega toe faaleleia.
Mo le silafia o lea alii Samoa sa malaga mai Samoa mo galuega faavaitaimi i Niu Sila nei ae o lea ua aafia ai i le tulafono.
Puna o Faamatalaga: https://www.nzherald.co.nz/nz/drunk-nelson-motorist-ralph-smith-35-times-the-limit-when-he-crashed-critically-injured-brother/
