O se alo ma se tamafanau a Samoa na maliu i le tausaga nei i se faalavelave na fana sesē ai i Amerika, ae sa lauiloa Samoa i le Pasefika ma le lalolagi i lona tomai i le su’iina o laei, le susuga Afa Ah Loo, ua amana’ia ma faatāua lona tomai i le polokalame su’isu’i ua faaulutalaina o le Su’i ma le Alofa poo le Stitched With Love a le Matāgaluega o Tinā ma Tama’ita’i, Atina’e o Afio’aga ma Agafesoota’i.
O se polokalame o loo lagolago e le ofisa o le malo o Saina i Samoa, le malo o Samoa ma le kolisi ua faaigoaina o le Human International Business Vocational College.
Na tatala e le Sui Palemia lea polokalame i le Aso Lua o le vaiaso nei o loo auai alii ma tama’ita’i e to’a onosefulu mai Upolu ma Savaii ma o le a a’oa’oina ai i latou i le tomai o le su’iina o laei eseese, o se taumafaiga e fesoasoani ai i o latou nuu ma aiga.
Se vaega o le saunoaga a le Sui Palemia afioga Toelupe Maoiautele Poumulinuku Onesemo na tatala ai le polokalame o le Su’i ma le Alofa, sa amata mai i le tausaga e 2017 i se fesoasoani o laausu’isu’i sa faameaalofa e Saina.
