Ua lipotia mai le amata fuafua ai o le Kolisi o Ueselē poo le Wesley College, e aga’i i le tulafono, faasaga i le Ofisa o Iloiloga o A’oga poo le Education Review Office, talu sa latou faai’uga e tapunia faitoto’a o le nofotumau a le kolisi.
E pei ona silafia o se taimi ua sola na tuuina mai ai le lipoti a le ERO e faailoa ai tulaga o le maualuga o a latou popolega i sauāga o loo faatino e nisi o fanau a’oga faasaga i nisi o tamaiti a’oga.
Ma na faaalia e le ERO, o le tele o faaseā e lē o lipotia atu ma ua vaaia le alualu pea i luma o aga nei a fanau o le faaoolima i le isi tamaiti a’oga; ae e lē o faia iai se fuafuaga a le a’oga.
Ae ui i se tele o aafiaga ua fofola nei e le ERO ua oo atu ai faaseā, ae ua tuua’ia e le Ulua’oga o le Kolisi, Brian Evans le ofisa o iloiloga i lo latou faatauānau ai o fanau e faapea e lē saogalemu le nofotumau poo le hostel.
Faailoa foi e Evans, e leai se uiga o le taumafai e tapunia le nofotumau, i le itu lea e lē mautinoa le saogalemu o se tamaitiiti a’oga e tusa lava pe tapunia ma aveese le laisene o le nofotumau pe leai.
Faaopoopo mai le alii ulua’oga, ua fai sina lē manuia o le taumafai a le ERO e tauānau fanau ina ia ioe ma faia ni faamatalaga lē sa’o ma faaleaga ai le hostel.
Ua faaalia e Brian ua savalia lelei e le a’oga tulaga uma ina ia mautinoa le malupuipuia o fanau a’oga mai le aafia i ni matāupu ogaoga, ae ua ia manatu ua faaaogā lava e le ERO matāupu tuai e fai agai ai a latou faai’uga.
Puna o Faamatalaga: https://www.rnz.co.nz/news/national/578526/education-review-office-badgered-students-about-safety-wesley-college-principal?cid=newsletter
