Ua ave le finagalo o le itumalo o Safata i le malo e taatia atu le sefulu miliona tālā o le taui mai le malo o Niu Sila e faasoa e latou.
Ua faailoa lea finagalo o le itumalo e le tama’ita’i Minisita o Tupe i le vaega faasalalau o le Talamua, ae pei ona silafia o lea tupe tele o le taui ona o aafiaga o afio’aga o Safata i le manuao o le fitafita o Niu Sila le Manawanui, o loo goto uga i gataifale o le afio’aga o Tafitoala i Safata.
I lea lipoti o loo faailoa ai foi e le Minisita o Tupe le afioga Mulipola Anarosa Ale-Molioo, e tolu vaega ua tuuina atu e le malo i lea itumalo e filifili iai i le faasoaina o le 10 miliona.
Muamua o le tuuina atu ia i latou o le taui tupe e faasoasoa, lona lua o le sa’ili o se tagata e avea ma Konesale e gafa ma le faia o le faasoa, ma le vaega lona tolu o le taatia atu o le faasoa e faatino e le malo.
Faaalia e le Minisita o Tupe i le Talamua, o le itu a Safata o loo ta’ita’i ai le sui faipule o Safata 2 le afioga Tuia Pu’a Fuatogi Letoa lea o loo iai lo latou finagalo e taatia atu le faasoaina o le taui tupe e 10 miliona tālā e faafoe e le itumalo.
E 14 miliona se isi vaegātupe sa faailoa e le Minisita o Tupe i se feiloa’iga talu ai ma tusitala o le a aumai e le malo o Niu Sila e ala i galuega ma polokalame mo le toe faaleleia o le gataifale o le itumalo ona o aafiaga mai suāuu ma isi otaota mai le manuao o le Manawanui na lofia ai le gataifale o Safata ina ua goto lea vaa su’esu’e o le fitafita a le malo o Niu Sila.
O se tasi o fuafuaga tāua ua faailoa e le Palemia susuga Laaulialemalietoa Leuatea Polataivao Fosi Schmidt i se faatalanoaga ma le Radio Samoa i ni vaiaso e le’i mamao tele atu, o le silasila i le lumana’i ma ni aafiaga o nuu ma afio’aga o isi itumalo e tuaoi ma Safata ona o le taoto ai nei o le manuao i gataifale o lea itumalo.
O le saunoaga a le Faipule o Safata 2 i le Palemene a o talanoaina le tala autū o le tupe ua mae’a pasia, sa ia faailoa ai se finagalo o lona itumalo o le aveese lea o le manuao mai ogasami o loo goto ai.
