Ua toe lua nei aso mae’a le ono vaiaso sa taualo ai foe o fautasi a vaega faaupufai auā a latou faalauiloa o faatosina o le palota lea sa momoli ai i nuu ma itumalo a latou tapenaga e ala i anavatau ua iai folafolaga o galuega ma faamanuiaga o le a maua e tagata pe afai o ai lava le patī faaupufai e manumālō.
Ua mae’a faalauiloa a le vaega faaupufai o le Faatuatua i le Atua Samoa ua Tasi ma le Samoa ua Potopoto e pei ona sa afea ai nuu ma afioaga o itumalo palota o le atunuu.
O le vaega faaupufai e puipuia aiā tatau a tagata o loo faaauau pea ma le fuafuaga e taualuga i le Aso Toonai o le vaiaso nei i le itumalo o Faleata 3.
E ui ua mae’a faalauiloa a le Faatuatua i le Atua Samoa ua Tasi ma le Samoa ua Potopoto i le afea o itumalo, ae o loo molimauina o loo faaaogā aso o loo totoe o faalauiloa faatosina i nisi o faasalalauga ma faatalanoaga a ia patī faaupufai e faaaogā ai a latou fesoota’iga televavave ma upega tafa’ilagi faapea nisi o auaunaga tau televise i le atunuu.
O le Aso Lulu o le vaiaso nei sa tapena ai le faletelevise o le TV3 mo sana polokalame e faatalanoa ai ta’ita’i o vaega faaupufai e tolu le HRPP, FAST ma le SUP peita’i ua faailoa e le pulega o lea faletelevise ua lē mafai ona faataunuu lea tapenaga ona ua lē avanoa ta’ita’i o isi patī faaupufai e mafua i nisi o fuafuaga ma tapenaga lava o le faigāpalota i le vaiaso fou.
Tasi lea o vaega tāua i taimi o faigāpalota e sa’ili ai sui usufono o le Palemene e le’i faatinoina lava i Samoa.
