Fai mai le taitai o le vaega faaupufai a le National, Christopher Luxon e le o iai se aafiaga o ia i le suiga ua iai nei i lē o le a avea ma Palemia o le atunuu ina ua mae’a le faamavaega a Ardern.
Fai mai Luxon i le faatalanoaga i le AM e le o tele se suiga ia te ia auā o le ‘au lava lea e tasi o loo iai e pei lava e na ona me’i mai o le flanker i le Numera 8 ma ni nai fetuunaiga laiti auā o le mea moni lava ia o Hipkins o se tasi lea o le toatolu lea sa faagaioia le faigamalo e aofia ai ma Ardern ma le Sui Palemia o Grant Robertson.
Fai mai Luxon mai le latou vaai, e na ona toe faaauau lava o le ‘au lea ma o Hipkins foi sa avea ma se vaega o se faigamalo e lei mafai ona kilivaina mea sa folasia, ua alu i tua le tamaoaiga o le atunuu, auaunaga tau le soifua maloloina aemaise aoaoga ma leai foi se tali o le mataupu i fale.
Na faailoa foi e le alii faipule o loo ia manao e faamautu o loo taulai le vaai a lana faigamalo i mataupu autu o loo feagai ma tagata aemaise mataupu tāua ia Niu Sila.
E le o faailoa se finagalo o le faigamalo i le lipoti lea e tusa o le finagalo faaalia o le taitai o le Itu agai.
