O le lavea o le vaalele a le Air India i le masina na te’a nei ua toe fafagu mai ai ma faafinauga i se tasi o matāupu na lotea mai i le auaunaga lea i le tele o tausaga ua mavae e faatatau i le faapipiiina o video cameras poo meapu’eata e mata’itū ai gaioiga a pailate i totonu o le vaalele.
O loo ta’ua i le CNN o se tasi o tagata iloga i le auaunaga tau femalagaa’iga faavaomalo a Initia, Willie Walsh, sa avea foi ma pailate na ia ta’ua o loo iai lava se finauga malosi ina ia faapipiiina ia meapu’eata i le pito i luma o vaalele e mata’itū ai gaioiga a pailate ia ogatasi ma faamaumauga i le meapu’eleo ma faamatalaga lea e masani ona faaaogā i su’esu’ega pe a tula’i mai ni faalavelave.
O le toe ta’ua la o le matāupu lea i le vaiaso nei ua toe lalaga ai finagalo o nisi i le faalavelave.
Ta’ua e le CNN o loo iai fesili e faatatau i le lipoti o le su’esu’ega o le faalavelave lea na maliliu ai tagata e 241 i Ahmedabad ma le 19 sa i luga o le fogāeleele.
O le finau ane la a i latou e lagolago i le faapipiiina o ia ituaiga meapu’eata pe ana faapea ua mae’a faapipiiina ia meapu’eata semanū e telē sona fesosoani i lea su’esu’ega.
Puna o Faamatalaga: https://edition.cnn.com/2025/07/16/asia/air-india-crash-cockpit-video-camera-debate-intl-hnk
