O le taaloga i Lotofaga ma le taaloga i Tuasivi a le ‘aulakapi liki o le Murri Gummaz mai Ausetalia lea e fili mai tagata apoliki ma tagata o le motu o Torres Strait Island, ua avea ma pine faamau o le malaga mai i Samoa o lea ‘aulakapi liki mo se isi a latou masii mai i se isi tausaga o i luma.
Ua māfua lea tulaga e pei ona faailoa i se pepa o faamatalaga ona e lē gata ua molimauina e lea ‘aulakapi liki e to’atele tupulaga i alii ma tama’ita’i i lo tatou atunuu e fiafia i le lakapi iuni ae ua faapena foi i le lakapi liki.
O le mae’a o le malaga taamilo a lea ‘au i Samoa na faia ai se faaafe a le Komesina Maualuga o Ausetalia i Samoa e faamavae atu ai i le ‘au, lea sa auai ma le Tama’ita’i Palemia o le malo tausi, o le ‘au mai lona afioga na muamua taaalo ma lea ‘aulakapi liki.
O le ‘aulakapi liki o le Murri Gummaz o loo faaauvaaina e tagata muamua o Ausetalia poo le Australia’s first people lea e faasino i tagatauli apoliki ma tagata o Torres Strait Island.
O se itu sili ona maualuga i le silasila a le pulega ma lea ‘au masii o le tausaafia ma le agalelei o o tatou tagata sa latou mafuta aemaise lava o ‘aulakapi liki a le atunuu sa latou taaalo.
E lē o faailoaina i le pepa o faamatalaga pe o le ā le faai’uga o le taaloga a lea ‘aulakapi liki ma le ‘au a Lotofaga ma Tuasivi.
