O le nofoaga o loo vaaia ma tausia ai fanau ua sauāina le Campus of Hope i Tuanaimato lea o loo pulea ma vaaia e le Toomaga mo ē Puapuagatia, ua latou maua se fesoasoani mai le kalapu o le Roteri o malosi’aga faafouina mai le malosi o le la e maua ai le eletise e ola ai le nofoaga.
Ua faailoa e le faalapotopotoga o lea fesoasoani ua malaga mai se inisinia e iai ona tomai i malosi’aga faafouina e tapena vaega uma mo le faapipiiina o apa e maua ai le malosi o le lā e maua ai le eletise.
O se isi lea o lavea’i taua i le maua o le eletise mo le nofoaga o le Campus of Hope ona o loo aafia pea le auaunaga masani o le eletise i le motusia.
E to’alua sui o le kalapu o le Roteri mai Niu Sila e aofia ai le inisinia o loo i Samoa i le vaiaso nei mo le faia o le galuega e maua ai le eletise mai malosi’aga faafouina.
