Ua lapata’ia mai nei e se tasi o foma’i i le vaega o faalavelave faafuase’i – Emergency, Paul Quigley le tugā o aafiaga ua iai tulaga o le soifua mālōlōina o le atunuu, e tele lava i ē ua faaaogāina le fualaau faasāina o le methamphetamine.
Faaalia e lenei alii foma’i o le faaaogā ai o lenei pauta faasāina i ona aafiaga e tai tutusa lelei ma tulaga o le tagata e taumafa tapaa mo se taimi umi lava.
O se faafitauli ua vaaia ai le to’atele o tagata ua aga’i atu i le falema’i.
Ua aafia i gasegase e aofia ai le fatu, e pei ona tuuina mai i lipoti mai le leitio faavaomalo a Niu Sila, o gasegase nei i le gagana Peretania o le premature heart disease, cardiomyopathy, heart failure, schizophrenia-like mental health disorders.
O le popolega a le alii foma’i ia Paul o le vave aafia o fatu o le to’atele e 40 tausaga le matutua o loo faaaogāina lenei pauta o le meth, ua molimauina le maua i le faama’i o le fatu e tele ina faato’ā maua ai lava tagata ua au i le 60 tausaga aga’i i luga le matutua.
O le vaega ua māua le ogaoga o aafiaga e ono oo iai o i latou ua silia ma le 10 tausaga o loo faatino mai pea le faaaogāina o lenei pauta faasāina.
O le popolega tele, e lē o vaaia se faaitiitia, ae ua valoia le ono faateteleina o lea faafitauli i tausaga o i luma.
Puna o Faamatalaga: https://www.rnz.co.nz/news/national/580573/nz-facing-health-crisis-from-chronic-methamphetamine-use-emergency-doctor
