O le aso 3 o le masina lenei o Novema na amata faamamalu ai se fautuaga o puipuiga o Samoa mai le faama’i o le misela e pei ona taulamua ai le Matāgaluega o le Soifua Mālōlōina.
O ia fautuaga e aga’i tonu i tagata malaga mai isi atunuu e afea Samoa, e pei o fanau e i lalo o le 12 tausaga le matutua e tatau ona tauave se pepa faamaonia e faamautū ai ua fai se tuipuipui o le misela.
Ua faailoa e le Sui Faatonu Sili o le Matāgaluega o le Soifua Mālōlōina le alii foma’i le afioga Tagaloa Dr Robert Thompson i le Samoa Global, o tapenaga tau i le puipuiga o le tatou atunuu i le toe tula’i mai ai i se taimi o le pepesi o lea faama’i, ua māta’itū ai tagata uma e ulufale mai i Samoa, lea ua iai le fuafuaga e taofia ma faanofoesea ni tagata e malaga mai ae o loo aafia i āuga o le misela.
