Ua tuuina mai faaseā a le to’atele o mātua i le maua o faamatalaga i le fafaga ai o a latou fanau i ni mea’ai ua legalegā ma ua mafu.
O ia mea’ai e pei ona māua e faatupeina e le malo ma e tauala mai lea i kamupani ma pisinisi gaoisi mea’ai ua faatulaga e faatinoina mea’ai mo taumafataga a fanau a’oga i le aoauli (lunches) i taimi o mālōlōga.
O lenei matāupu na alia’e mai i le Haeata Community Campus i Kalaiesitete.
Faamauina na maua e se tasi o faia’oga le tulaga faaletonu ua iai mea’ai, ae ua mae’a ona tufatufaina atu i tua i fanau nei mea’ai.
Ta’ua faato’ā iloa lava e le to’atele o fanau e legalegā mea’ai a ua ‘afa mea’ai ua aai ai, ma ua amata ona faalogoina le ese o le manogi o le mea’ai.
Faamatala e se tasi o mātua, na amata vaaia le ma’i o lana tama e 12 tausaga le matua, ina ua maualuga le fiva ma tulaga lē lelei le feagai ai ma lea tamaitiiti.
I lipoti mai le RNZ o loo faaalia ai o nei mea’ai taumafa na gaosia ma na aumai pe na sapalai mai e le kamupani e igoa o le Compass Group e tauala mai le polokalame o le School Lunch Collective.
E manatu le sui ta’ita’i o le malo, David Seymour, atonu na sesē le tufaina atu e lea a’oga o mea’ai o le isi aso e fafaga ai fanau, ona e lē o iai lava nisi matāupu ua faapea atu ua mama’i ni fanau i ni mea’ai taumafa.
O faaupuga ma manatu ua faaleo e Seymour, manatu e iai tulaga e lē fiafia ai le ta’ita’i i le ulua’oga o lea a’oga, ona e fai lava sina tele o faaseā ma taimi e alu ai lea tagata i luga o le TV ma faaali ona lagona lē fiafia i le malo.
Ae o loo tuua’ia e le ta’ita’i o le Itu Agai le Leipa, Chris Hipkins le malo i lo latou tuuina atu o mea’ai taumafa lē lelei ma le lē saogalemu mo fanau a’oga.
Puna o Faamatalaga: http://rnz.co.nz/news/national/580553/parents-horrified-children-ate-mouldy-mince-in-government-funded-school-lunches
