Ua lē su’esu’eina e le faamasinoga o faigāpalota i ee lu’i faasaga i le monotaga faalenuu sa faaulu e le afioga Valasi Luapitofanua Toogamaga Tafito Selesele sa avea ma Faipule o Vaisigano 2 o loo toe tauva i le tofi o le itumalo, ina ua faaui i tua e le loia a le itu tagi lea lu’i.
O le tauaofiaga a le Faamasinoga Maualuga i le Aso Lua ananafi i Samoa sa faailoa ai e le loia le afioga Fuimaono Sarona Ponifasio, ua finagalo lē sa faauluina le lu’i e ave i tua e pei o mafua’aga ua faailoa i le talosaga.
O le tasi o sui tauva a le vaega faaupufai o le Faatuatua i le Atua Samoa ua Tasi le afioga Tagaloa Leilua Tupou Afa, sa faasaga iai le lu’i, ma sa ia faailoa mai lona agaga faafetai i le sui tauva o le Samoa ua Potopoto ona ua faatamalii sana faai’uga i lona talia o se finagalo o le itumalo e toe faasolomuli i tua lana tagi.
Le afioga Tagaloa Leilua Tupou Afa i sona finagalo ina ua mae’a ona faaui mai i tua le lu’i sa finauina ai lona agavaa i le monotaga faalenuu.
O le faaui i tua o lea matāupu ua faalēaogāina ai e le Faamasinoga Maualuga, ae ua totoe ai nei lu’i e lima faasaga i monotaga ma faai’uga a le Komesina ua mae’a ona su’esu’eina molimau.
O le Aso Faraile nei e aumai uma ai faai’uga o ia lu’i e aofia ai le matāupu mai le itumalo o Gagaifomauga 3, o Gagaemauga 1, ma lu’i e lua mai le itumalo o Faleata 2.
E 11 matāupu o lu’i faaletulafono faasaga i aiaiga o le monotaga i le nuu ma faai’uga a le Komesina sa faaulu i le faamasinoga, peita’i ua faasolomuli i tua lu’i e 4, faalēaogā lu’i e tolu ona o faai’uga o finauga faaletulafono, ma ua totoe ai lu’i e 4 sa su’esu’eina molimau o le a aumai iai ni faai’uga ma iloa ai pe faamaonia pe lē faamaonia moliaga o le lē faamalieina o aiaiga o le monotaga faalenuu.
