Ua talia e le tama’ita’i Faamasino o le Faamasinoga Faaitumalo le afioga Papalii Alalatoa Rosela Papalii le tatalo a le itu a leoleo e tuu atu se isi vaiaso e faamautū ai a latou moliaga uma faasaga i sui faasalalau o le polokalame o le Maota o Viiga i Sini Ausetalia lea na tula’i i le faamasinoga i le Aso Lua o le vaiaso nei mo le valaauga muamua o le la faamasinoga e pei ona tuua’ia i lo la faia o se faasalalauga taufaaleaga e faaaogā ai auala o fesoota’iga faatekonolosi.
O i laua o loo molia o le tinā ia Ainuu Iliganoa Savaiinaea ma lona to’alua le afioga Toleafoa Saia Tolefoa ma e faamautū i le aai o Sini i Ausetalia o loo faafoe ai le la polokalame faasalalau i luga o le api o foliga.
Na pu’eina ma taofia i la’ua i se vaiaso e le’i mamao atu a o sauni e tuua le atunuu mo le toe foi atu i Ausetalia.
O le Aso Lua o le vaiaso fou, le aso 18 o Novema o le a toe valaau ai le matāupu lenei tau faamasinoga ae ua faaauau ona tatala i tua i la’ua ua molia i ni aiaiga e aofia ai ma le faataga ona toe faia a la faasalalauga ae faasā ona afea ai se faamatalaga e aafia ai le itu tagi.
O le alii loia le afioga Faimalomatumua Mathew Lemisio o loo tula’i mo Ainuu Iliganoa Savaiinaea ma Toleafoa Saia Toleafoa.
O le polokalame o le Maota o Viiga e pei ona molimauina, e lagolago malosi i le patī faaupufai e puipuia aiā tatau a tagata ma sa molimauina lea lagolago i le auai atu o le failautusi o le vaega faaupufai le tofa Lealailepule Rimoni Aiafi i le valaauga muamua o moliaga o sui o lea polokalame tau leitio i luga o upega tafa’ilagi.
O le aso ua toe tolopo iai lenei matāupu tau faamasinoga, o le a folasia ai ma le talosaga a i laua o loo molia e ala i le la loia mo se faatagaga e tuua ai Samoa poo le application to leave the jurisdiction.
