E 5 lelei ni faamomoli o fualaau faasāina na maua ma taofia e le Ofisa o Tiute i totonu o le lata i le 2 vaiaso.
O se vaaiga mata’utia le faatupula’ia o gaioiga faasolitulafono o loo faia e tauala mai i faigāmalaga e aga’i mai i le malae vaalele faavaomalo i Aukilani.
O le amataga o lenei vaiaso na tuuina atu ai a tatou lipoti e faailoa atu ai o le vaiaso talu ai na maua, pu’e faapagota ma molia ai ni tagatānuu Amerika i lo latou aumai faananā o fualaau faasāina o le methamphetamine i totonu o Niu Sila.
Māua na aumai i totonu o ni atopa’u nei pauta faasāina, e ala i ni afīfī.
E oo atu i le 30 kilokalama le mamafa o ia fualaau faasāina.
I le aso 9 o Novema na māua ai i faamatalaga mai le Ofisa o Tiute, e 69 tausaga o se tagatānuu Farani, na faimalaga mai Aferika i Saute, na malaga mai Hong Kong, na ia aumai faananā le 2 kilokalama o le ‘aisa o le meth e faaaogā ai se auala taufaasesē, o se tusi e fausia i se laupapa ua faaulutalaina o le Apologize, Forgive, Forget.
E oo atu i le $594,300 le tau poo le value o lenei ‘aisa.
Ae i le amataga foi o lenei vaiaso, i lona aso 10 o Novema, na maua ai se tagatānuu Amerika e 32 tausaga le matua na taunuu mai i Niu Sila i se faigāmala mai San Francisco na ia aumai ai ni afīfī e 36 (vacuum-sealed packages) o loo iai le oo atu i le 19 kilokalama o le meth, i lona tau e 5.7 miliona ma le 3 kilokalama o le cocaine pe tusa lea ma le $1,050 lona tau.
Mai le faasalavei ai e sui o le tiute o nei faamomoli, na māua ai le oo atu i le 50 kilokalama o le methamphetamine na taofia ma le 3 kilokalama o le cocaine.
Faamaonia e le Faatonu o le Ofisa o Tiute i le malae vaalele faavaomalo i Aukilani, le maualuga ma le tele o le fualaau faasāina ua maua i totonu lava ia o lenei tausaga e 2025, e pei ona faamauina le oo atu i le 670 kilokalama o le methamphetamine ma le 3 kilokalama o le cocaine ua maua ai.
O ni faamaumauga ma matāupu ua mautinoa ai lava le taumafai pea o ē o loo faia ia gaioiga faasolitulafono e faaulufale mai fualaau faasāina nei i totonu o Niu Sila, ae ua faaalia e le Ofisa o Tiute, o le a galulue pea, e taofi nei fualaau faasāina mai le oo mai i totonu o le atunuu.
Puna o Faamatalaga: https://www.customs.govt.nz/about-us/news/media-releases/customs-catches-five-methamphetamine-couriers-in-just-over-a-week?
