Ua faalauiloa mai e le Minisita o Aoga, Erica Stanford se fuafuaga o le a taofia ma aveese ai le tele o upu o le gagana Maori mai tusi faitau, o lomiga fou mo fanauiti, o loo a’oa’oina ma faitauina i fanau e 5 tausaga le matutua.
I se lipoti a le Matāgaluega na faailo ai o le masina o Oketopa o le tausaga na se’i mavae atu nei, na tonu ai manatu a le tama’ita’i minisita i lea fuafuaga, ina ia taofia le toe tuu o upu ma faaupuga o le gagana Maori i tusi faitau a fanau, se’i vaganā ai igoa o tagata o loo aofia i totonu o tusi faitau poo characters.
O faatinoga o le a fai i se tusi ma lomiga fou, a le Matāgaluega ma se tasi o ana polokalame ua faaigoaina o le Ready to Read Phonics Plus (RtRPP) series.
E ta’ua o le mafua’aga na taunuu ai le faai’uga ona e faapea, o le fai alofa i fanauiti, e faigatā ona malamalama i upu Maori, aemaise a o taumafai e a’oa’oina le faitau tusi i le gagana Peretania, a o fefiloi ai ma upu Maori.
Manatu o le a leiloa e le tamaitiiti ona faavasega i lona mafaufau faaupuga o loo faitau iai.
Faamanino e Stanford i le RNZ, e na o le 12 lava tusi faitau o loo totoe mo le polokalame poo le series o loo aafia i lenei fuafuaga.
Ae foliga mai o le a toe lolomi le 27 o tusi o le polokalame ona o lea suiga e aveesea ai upu Maori.
Puna o Faamatalaga: https://www.rnz.co.nz/news/national/569782/education-minister-cut-maori-words-from-future-junior-books-documents-reveal
