O le vaiaso nei ua faataunuu ai i Ausetalia le faamoemoe o le Roadshow a Samoa 2025 e aofia ai setete e tolu, Kuiniselani, Melepone ma Sini i Niu Sa Uelese.
O le faamoemoe o le Roadshow o le faalauiloa o Samoa ma o se taumafaiga o loo galulue faatasi ai le Samoa Tourism Authority ma ana paaga faapisinisi mo le faamoemoe e faalauiloa tulaga tau i faigāmalaga, aemaise o avanoa o auaunaga ma tautua o loo ofoina i le atunuu.
O se taumafaiga foi o loo galulue faatasi ai le ofisa o tagata tafafao maimoa atu i Samoa ma auaunaga tau fefaataua’iga i Ausetalia, ae lē gata i lea o kamupani vaalele, o le aufaasalalau ma isi ina ia sana faamalosia faiga faapaaga mo le faalauiloa atili o Samoa i le lalolagi faapea ma ona si’osi’omaga ma lana masani o le talimalo.
O le po anapo na faataunuu ai le faamoemoe i Brisbane ma sa to’atele na auai, faasolo mai i Melepone i le aso ma faai’u mai ai i Sini i le aso a taeao.
O le sui o le Samoa Tourism Authority i Ausetalia nei, Aniva Tuiletufuga Nickel na ia faailoa o le naunauta’iga ia faalauiloa atili lo tatou atunuu aemaise o nai auaunaga o loo tautuaina le pa’au atu o tulisi ma tagata tafafao i Samoa.
