I se lipoti lata mai o le matāupu e aofia ai Amerika, Iran ma Isaraelu ua faailoa mai le faatumauina pea o le faatuatuaga o le faigāmalo a Trump i le manuia o osofa’iga na faia ia Iran ma ona nofoaga faaniukilia i le faai’uga o le vaiaso talu ai lea na o latou ta’ua ai ua matua’i soloia e ia osofa’iga polokalame faaniukilia a Iran.
Ua faailoa e le CNN ua faatino foi se faamatalaina o le osofa’iga lea i Iran i le vaiaso nei ma e mau eseese ai foi nisi o loo iai i upufai o le malo.
Ua faailoa manino e le minisita o le va i fafo a Iran o Abbas Araghchi e lē o iai ni fuafuaga a Tehran e faaauau faatalanoaga i le matāupu lea i niukilia faatasi ma Amerika ae o loo iai foi nisi lipoti o loo agiga ai o loo galulue le pulega o le faigāmalo a Trump i se avanoa e toe aumaia ai Tehran i le laulau mo feutana’iga i lea matāupu.
Ua faailoa foi i le lipoti se faamatalaga mai le minisita o le puipuiga a Isaraelu o Israel Katz e faapea o loo manino, o osofa’iga a Amerika i Iran ua faaleagaina ai si’omaga ae lē o aveesea ai mea patino tau niukilia o loo iai.
Ua iai foi faamatalaga ua ta’ua ai sa taumafai Iran e kava pe pupuni nofoaga e ulufale ai i vaega na iai facilities faaniukilia a o le’i faatinoina le osofa’iga a Amerika.
O le vaiaso nei ua faamatuu mai ai e le militeli a Amerika isi faamaumauga fou e faatatau i le osofa’iga lea ae o loo iai nisi fesili e lē o mafai ona taliina e fua i ia faamatalaga aemaise lava i le fesili pe faamaonia ua matua’i soloia ma faaleagaina atoa le polokalame faaniukilia a Iran.
Puna o Faamatalaga: https://edition.cnn.com/world/live-news/israel-iran-conflict-us-trump-06-26-25-intl-hnk
