O le auaunaga a le Matāgaluega o Faato’aga ma Faigāfaiva o loo latou siakiina ato ma uta e faaulufale mai i le atunuu, ina ia malupuipuia le sao mai o ni iniseti poo nisi ituaiga o manu faalafuā e lamatia ai a tatou laau totō ma laau tau faato’aga, o se galuega e tāua tele.
O nisi o ato ma uta feavea’i e nanā mai ai fatulaau poo ni lālālaau totō faapea isi ituaiga o oloa o laau tau faato’aga ae mafai ona sao mai ai ma iniseti faalafuā.
O lea ua iai nei se masini fā’ata fou e faaaogā i le malae vaalele faavaomalo i Faleolo e māta’itū lelei ai ia tulaga.
O se masini fā’ata ua faaalia e le matāgaluega o faato’aga ma faigāfaiva i se pepa o faamatalaga, o le a iloa gofie ai ni laau totō ma laau tau faato’aga e aumai i totonu o ato malaga ma pusa e fafao mai ai ni oloa mo uta.
O le amataga o lenei masina fou o Tesema na faalauiloa ai le faaaogāina o lea masini fā’ata, i se sauniga sa avea ai le Minisita lagolago o le Matāgaluega o Faato’aga ma Faigāfaiva e na te faalauiloa aloa’ia lea masini i se sauniga.
Sa faailoa ai foi ma le togiga fou ua lae’iina e le vaega o le matāgaluega o loo latou māta’itū le saogalemu o laau ma faato’aga i Samoa i ni iniseti faalafuā e sao mai i ato ma uta feavea’i ma faaulufale mai i lo tatou atunuu.
