Ua iai suiga i faamaumauga a le ofisa o le komisi o faigāpalota i le aofa’iga o tagata palota ua faamauina mo le lola autū auā le faigāpalota tele i le aso 29 o le masina nei.
O le feiloa’iga masani a le Komesina o faigāpalota ma le vasega o alii ma tama’ita’i tusitala sa ia faailoa ai e 102,981 le aofa’iga o tagata palota ua iai nei, poo le 87 pasene.
O lea numela ua aofia ai ma le 16 o tagata palota o le itumalo o Falealupo sa fesiligia lo latou agavaa i se tagi sa i luma o le faamasinoga.
O nisi o tapenaga ua faailoa e le Komesina o faigāpalota le afioga Toleafoa Tuiafelolo Alexander John Stanley, o a’oa’oga mo le ‘au vaavaai palota mo sui tauva lea e ta’ua i le gagana Peretania o scrutineers.
O le vaiaso nei ua amata ai lea a’oa’oga i le motu o Savaii ma le faamoemoe a mae’a ona see mai lea i Upolu.
