Ua faamaonia mai nei e ala i se faasalalauga i luga o upega tafa’ilagi a le Ofisa o le Tiute, lo latou taofia ai o ni pauta faasāina o le ‘aisa poo le cocaine na aumai e ala i se uta, o se shipping container na taunuu mai i le uafu i Tauranga i le aso 4 o Tesema.
I faamatalaga e faapea, o lea uta na maua ai le oo atu i le 45 kilokalama o le cocaine, ma e māua, o le uta na aumai mai Huston i Amerika.
Faailoa na aga’i mai lea i Balboa, Panama; ma e ta’ua na iai masalosaloga e iai tulaga o manu faalafuā ma uta e ono aafia ai le atunuu i le taunuu mai o le uta; o le ala lea na afua ai loa sa’ili’iliga a le vaega o tiute i le uta.
Faamauina le faaaogā ai o le masini x-ray e faatino ai sa’iliga, na faaalia ai tulaga o le vaaia ma le maua o ni vaega e seāseā molimauina i taimi o siaki masani, o lea na faatino ai loa ni sa’ili’iliga mae’ae’a i le uta.
O i’i lea na maua ai loa e sui o le tiute o fualaau faasāina – ni afīfī e foliga o ni poloka piliki, o loo nanā mai i le tele o oloa na aumai i lea uta.
Faamauina na nanā mai pauta faasāina nei e ala i le afīfī lelei mai ma faapipii iai ma se vaega ua pei o se faailoga o se pisinisi poo se logo e aofia ai Volvo, Porsche ma le Crowned Hamster.
Faamanino e le sui o le ofisa o tiute ma le vaega o Puipuiga i luga o le vasa – Customs Manager Maritime o Robert Smith, o se galuega o loo atagia ai pea le galulue malosi o le auaunaga ma ana paaga e tali atu i le tele o soligatulafono e tula’i mai, aemaise le tetee atu i fualaau faasāina e ofi mai i totonu o Niu Sila.
Puna o Faamatalaga: https://www.customs.govt.nz/about-us/news/media-releases/customs-seizes-45-kilograms-of-cocaine-in-tauranga
