I lenei taimi o le tausaga ua faia ai laugatogi faai’u e molimauina ai e mātua seleselega a le fanau ia i latou ua faai’uina ma le manuia le taumafai, o isi ua toe sauni e faaauau i le tausaga fou, ae o isi ua lē i’u manuia le taumafai.
O le faamanuia a le Kolisi Faafaife’au i Malua mo le faauuga o le vasega faai’uaso sa molimauina ai le faai’uga o a’oa’oga i le fā tausaga sa a’otauina ai a’oa’o e to’a 21 ua faai’uina ma le manuia le taumafai.
O le to’asefuluiva o A’oa’o ua maua le faailoga o le Bachelor of Theology ae to’alua ua faamanuiaina i le faailoga o le Bachelor of Divinity with Honors.
E to’asefululua sa faauuina i le faailoga o le Master of Theology, ae sa faauu ai foi ma nisi o faia’oga ua maua le faailoga o le polofesa lagolago ma o susuga i faife’au faia’oga o loo umia faailoga foma’i.
O le tausaga nei foi na amata aloa’ia ai i totonu o le kolisi faafaife’au ona su’e le faailoga foma’i o le matāupu silisili ma o le taimi muamua lea ua su’eina ai lea faailoga maualuga i totonu o Malua.
Sa faatumulia le malumalu o le Iupeli i le to’atele na auai e patipatia le faai’uina o le fā tausaga o a’oa’oga a A’oa’o e to’a 21 ua faauu poo le vasega faai’uaso o lenei tausaga 2025.
